Окт282012

112
Понекогаш за она „клиентот е лош“ или „јас ги имам најлошите клиенти“ и самите фриленсери се виновни. Ќе се запрашате зошто е тоа така?

 

Затоа што повеќето клиенти во старт не знаат што сакаат, дури и да знаат не секогаш знаат тоа добро да го објаснат. Овде е вашата задача да знаете да го извлечете најбитното од клиентот и она што ќе ви помогне за да на крај и вие и клиентот се задоволни од крајниот резултат. За таа цел, најдобро е да имате однапред дефинирани прашања или краток бриф доколку тоа го правите преку директен контакт или Скајп. За секој проект тој бриф треба да е различен, не може исти прашања да имате за дизајн на постер и на веб страна. Како пример ќе го земам дизајнот на лого и кои основни прашања би требало да ги знаете и да ги имате одговорено од страна на клиентот.  За да ви биде полесно ги поделив на 5 помали групи на прашања.

1. Состојба

Првично запознавање. Дали е нова компанија, дали се ребрендира и е со веќе со подолга традиција.
Ова е многу важно бидејќи во старт мора да знаете дали имате целосно нов дизајн на лого или е само редизајн на старото. Ако е редизајн, продолжувате со потпрашања за да знаете што клиентот сака да задржи од старото, дали е симболот, боите или сл. а што би сакал да смени. Ова не значи дека само треба да запишувате што бара клиентот туку и со ваши совети да давате сугестии како вие мислите дека ќе е најдобро.
Ако бара сосем нов дизајн, логички би било да се менува и целосниот корпоративен идентите на компанијата. Ова со себе повлекува од нови визит карти за вработените, преку ново брендирање на службените возила до нова веб страна и сл. За македонски клиенти ова може да биде проблем од финансиски аспект бидејќи ретки се оние комапнии кои инвестираат наеднаш во сите промени. Задолжително во вакви ситуации советувајте како е најдобро, користете примери од претходни ваши клиенти. Во вакви случаеви “најбезболно“ е да се оди постепено. Колкаво би било тоа темпо најмногу зависи од буџетот на клиентот и како би сакал да биде распределен.

8-be-patient

2. Цел

Поточно која е целта на компанијата со новото ребрендирање? Дали е само поради застарено лого, или можеби за ширење на пазарот на светски рамки?
Која порака или пораки сака да ги пренесе со новиот идентитет? Која е моменталната перцепција на потрошувачите, а која е посакувана перцепција?
Преку овие прашања ќе може лесно да направите слика на просечен потрошувач по пол, возраст, образование итн. што е многу важно бидејќи таа група треба да ваша таргет група преку новиот визуелен идентитет.

3. Конкуренти

За македонски клиенти ова можете лесно и сами да направите мало истражување и лесно да го откриете. Но, ако клиентот е од помал град во Нов Зеланд на пример, слободно прашајте и тоа ако може со линк до нивни веб или фејсбук страни и сами да го проверите, не само логото, туку и целокупните материјали и нивни дизајни. Штом имате минимум 5 конкуренти продолжувате понатаму. Преку прашањето, „кои логоа ви се допаѓаат?“ вие добивате насока во која би требало да се движите. Пак ќе повторам, ова не треба да е стриктно правило туку слободно може да понудите еден дизајн според тоа како вие мислите дека е најдобро. Никако не го заборавајте и прашањето, „кои логоа не ви се допаѓаат?“. Понекогаш ова е побитно од првото прашање. Нормално тука се и потпрашањата, зошто (не) ви се допаѓа со краток опис од страна на клиентот.
Ако е веќе постоечка компанија, побарајте дизајн решенија за да видите како е аплицирано логото. Преку ова од прва ќе видите дали клиентот од оние „make the logo bigger“ или дава предност на визуелната порака, а логото е во заден план.

8-designprocess

4. Буџет

Можеби едно од најважните прашања, ако не и најважно посебно за македонските клиенти. Дали клиентот има однапред дефинирано буџет за целиот проект или очекува ваши понуди. Секако мора да сте спремни и за двете варијанти. Ако има буџет, прво дали ви одговара и ако да што би можеле да понудите во рамки на тој буџет. Значи колку различни дизајн решенија на лого, а понатаму и колку дизајни за меморандум или визит карти на пример, доколку се разбира се тоа би било покриено со таа сума.
Ако нема, вие му праќате ваши понуди на дизајн пакети. Обично сите ние си имаме ценовник. Пратете конкретна и детална понуда. Значи број на дизајни, број на варијации на одбраното, дали со тоа има принтани примероци за полесно да одлучи, значи детално што се ќе покрие, за да понатаму да не се најдете во ситуација клиентот да ви каже „јас мислев дека тоа е вклучено во пакетот“

5. Рок

Иако на крај, рокот може да биде одлучувачки фактор дали ќе ја прифатите работата или не, посебно научени од македонското „ми треба за вчера“.
Тука можете прашањето да го поставите и поинаку. Клиентот по негова важност да ви ги нареди: квалитет, брзина и цена. Или друг метод е да ако мора да одбере само две кои би ги одбрал. Верувајте понекогаш само со ова вие веднаш знаете со каков клиент (ќе) си имате работа.

 


 

Овие прашања не се дадени еднаш и засекогаш. Како што секој клиент е различен, така и вие ќе имате помалку или повеќе потпрашања. Како што наведов и на почетокот, ова е само добра основа без која не е препорачливо да почнувате со работа.

Можеби на почеток ќе ви биде тешко сето ова да го насочите кон еден креативен процес, но верувајте со тек на време и како сте поискусни ќе сфатите дека колку повеќе прашања имате и колку подетални одговори добивате само полесно и побрзо ќе ја завршувате работата.

Сето ова убаво спакувајте го во еден документ, најдобро пдф но може и ворд и имајте го барем на 3 различни јазици.
Во коментарите подолу додадете и нови прашања кои вие ги поставувате на вашите клиенти.

 

 

коментари (0)add comment

Пратете коментар
намали | зголеми

busy

Copyright 2017. Сите права задржани, дозволено преземање материјали под одредени услови Creative Commons